ఆంధ్రప్రదేశ్‌లో పోలీస్ అధికారిపై అధికార కూటమికి చెందిన ఓ ఎమ్మెల్యే తీవ్రంగా కొట్టారంటూ సోషల్ మీడియాలో ఒక వీడియో తెగ వైరల్ అవుతోంది. అందులో ఒక వ్యక్తి పోలీస్ ఆఫీసర్‌ను కొడుతున్నట్లు ఆ వీడియోలో కనిపిస్తోంది. ఈ వీడియోను వైసీపీ నేతలు షేర్ చేస్తూ.. కూటమి ప్రభుత్వంలో నేతలు రెచ్చిపోయి పోలీసులపైనే దాడి చేస్తున్నారంటూ పోస్టులు పెడుతున్నారు. దీనిపై తీవ్ర విమర్శలు వెల్లువెత్తుతున్నాయి. అయితే ఇంతకీ ఆ వీడియో ఎక్కడిది అనేది ఈ స్టోరీలో తెలుసుకుందాం.
క్లెయిమ్ ఏంటి?
ఏపీలో కూటమి ప్రభుత్వంలోని ఒక ఎమ్మెల్యే పోలీస్ అధికారిని కొడుతున్నారంటూ సోషల్ మీడియాలో ఒక వీడియో వైరల్ అవుతోంది. Sreenivasulu Yaraballi అనే ఫేస్‌బుక్ యూజర్ ఆ వీడియోను పోస్ట్ చేస్తూ చంద్రబాబు ప్రభుత్వంపై తీవ్ర విమర్శలు గుప్పించారు. “డ్యూటీలో ఉన్న పోలీస్ ఆఫీసర్‌ని పిచ్చకొట్టుడు కొట్టిన కూటమి ప్రభుత్వం ఎమ్మెల్యే.. రాష్ట్రంలో రెడ్‌బుక్ రాజ్యాంగం నడుస్తోంది” అని ఆ వీడియోకు క్యాప్షన్ ఇచ్చారు. ఈ వీడియోను పలువురు నెటిజన్లు షేర్ చేయడంతో నెట్టింట తెగ హల్‌చల్ చేస్తోంది.
నిజం ఏంటి?
పోలీస్‌పై దాడి జరిగింది నిజమే కానీ.. అది ఏపీలోని కూటమి ఎమ్మెల్యే చేసింది కాదు. పైగా ఆ సంఘటన ఆంధ్రప్రదేశ్‌లో కాకుండా ఉత్తర్‌ప్రదేశ్‌లో జరిగినట్లు సజగ్ టీమ్ ఫ్యాక్ట్‌చెక్‌లో వెల్లడైంది.
వెరిఫికేషన్ అండ్ మెథడాలజీ
వైరల్ అవుతున్న వీడియో ఎక్కడిది అని తెలుసుకునేందుకు మా సజగ్ టీమ్ నెట్టింట పరిశోధన చేసింది. వైరల్ క్లిప్‌లోని కీ ఫ్రేమ్‌ను స్క్రీన్ షాట్ తీసి గూగుల్‌లో సెర్చ్ చేయగా.. దానికి సంబంధించిన వీడియో కనిపించింది. అది ఓపెన్ చేసి చూడగా అసలు విషయం వెలుగులోకి వచ్చింది. ఆ వీడియోలో ఒక ఎస్సైని ఓ వ్యక్తి కొడుతున్నట్లు ఉంది. అయితే ఆ ఘటన ఉత్తర్‌ప్రదేశ్ రాష్ట్రంలో జరిగినట్లు తేలింది. అది బీజేపీకి చెందిన కౌన్సిలర్ ఎస్సైని చితక్కొడుతున్న వీడియో కాగా.. ఆంధ్రప్రదేశ్‌లో జరిగిందంటూ సోషల్ మీడియాలో పోస్టులు పెడుతున్నారు.
మరోవైపు.. ఈ ఘటన గురించి మరింత సమాచారం తెలుసుకునేందుకు ఏపీలో ఎవరైనా ఎమ్మెల్యే పోలీస్‌పై దాడి చేశారా అని సంబంధిత కీవర్డ్స్‌తో గూగుల్‌లో సెర్చ్ చేయగా.. ఎలాంటి వార్తలు కనిపించలేదు. ఈ క్రమంలోనే ఆంధ్రప్రదేశ్‌లో నకిలీ వార్తలను గుర్తించి.. వాటికి సంబంధించి నిజాలను ప్రజలకు అందించేందుకు ప్రభుత్వం ఏర్పాటు చేసిన FactCheck.AP.Gov.in అనే ఎక్స్ అకౌంట్‌లో కూడా దీనికి సంబంధించిన వార్తను పోస్ట్ చేశారు. వైరల్ వీడియోకు సంబంధించిన పోస్ట్ స్క్రీన్ షాట్ షేర్ చేస్తూ.. “ఉత్తర్‌ప్రదేశ్ రాష్ట్రంలో జరిగిన ఘటనను కూటమి ప్రభుత్వంపై కుట్రపూరితంగా ప్రచారం చేస్తున్నారు. ప్రభుత్వంపై విషప్రచారం చేస్తున్న వారిపై కఠిన చర్యలు తీసుకుంటాం” అని క్యాప్షన్ ఇచ్చారు.
తీర్పు
ఓ వ్యక్తి పోలీస్‌ను కొట్టిన దృశ్యాలను సోషల్ మీడియాలో షేర్ చేస్తూ.. కూటమి ఎమ్మెల్యే దాడి చేశారని తప్పుగా వైరల్ చేస్తున్నారు. పైగా ఆ ఘటన ఉత్తర్‌ప్రదేశ్‌లో జరగ్గా.. ఏపీలో జరిగినట్లు తప్పుగా ప్రచారం చేస్తున్నారు.
రచయిత గురించిశివరామచారి తాటికొండశివరామచారి తాటికొండ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ జాతీయ, అంతర్జాతీయ వ్యవహారాలకు సంబంధించిన తాజా వార్తలు, రాజకీయ వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 4 సంవత్సరాలకు పైగా అనుభవం ఉంది. గతంలో ప్రముఖ మీడియా సంస్థల్లో పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
