తిరుమలలో అపచారం జరిగింది. తిరుమలలో అన్యమతానికి చెందిన వ్యక్తి నమాజ్ చేసిన ఘటన మరువకముందే మరో అపచారం జరిగింది. బాధ్యతగా ప్రవర్తించాల్సిన పోలీసులే.. మద్యం తాగి కొండపైకి చేరుకున్నారు. మద్యం మత్తులో తమ వాహనంతో మరో వాహనాన్ని ఢీకొట్టి హల్ చల్ చేశారు. ఈ ఘటన శుక్రవారం సాయంత్రం కలకలం రేపింది. ముగ్గురు ఏపీఎస్పీ బెటాలియన్ పోలీసులు ఈ అపచారానికి పాల్పడ్డారు. టీటీడీ విజిలెన్స్ సిబ్బంది వీరిని అదుపులోకి తీసుకుని కేసు నమోదు చేసినట్లు సమాచారం.
ప్రమాదం గురించి సమాచారం అందుకున్న టీటీడీ విజిలెన్స్ అధికారులు వెంటనే ఘటనాస్థలికి చేరుకున్నారు. ముగ్గురు ఏపీఎస్పీ బెటాలియన్ పోలీసులకు బ్రీత్అనలైజర్ టెస్ట్ చేయగా.. 300 పాయింట్లు చూపించినట్లు సమాచారం. దీంతో ముగ్గురు కానిస్టేబుళ్లను టీటీడీ విజిలెన్స్ అధికారులు అదుపులోకి తీసుకుని తిరుమల టూటౌన్ పోలీస్ స్టేషన్కు తరలించారు. ఈ ఘటనపై తిరుమల టూటౌన్ పోలీసులు కేసు నమోదుచేసుకుని దర్యాప్తు జరుపుతున్నారు. మరోవైపు ఈ ఘటనపై టీటీడీ ఏఈవో వెంకయ్య చౌదరి కూడా స్పందించినట్లు సమాచారం. తిరుమలలో నిబంధనలు ఉల్లంఘించిన వారిని ఉపేక్షించబోమని ఆయన స్పష్టంచేసినట్లు తెలిసింది. నిబంధనలు అతిక్రమించిన వారు పోలీసులైనా కఠిన చర్యలు తప్పవని స్పష్టం చేసినట్లు సమాచారం.
మరోవైపు గురువారం కూడా తిరుమలలో భద్రతా వైఫల్యాన్ని బయటపట్టే ఘటన చోటుచేసుకుంంది. తిరుమలలో అన్యమత ప్రచారం పూర్తిగా నిషేధం కాగా.. గురువారం ఓ వ్యక్తి నమాజ్ చేయటం కలకలం రేపింది. తిరుమలలోని పాపవినాశనం రోడ్డులోని కళ్యాణవేదిక సమీపంలోని పురోహిత సంఘం వద్ద ఉన్న ఖాళీ ప్రదేశంలో అన్య మతానికి చెందిన వ్యక్తి నమాజ్ చేసిన వీడియో వైరల్ అయ్యింది. సీసీ కెమెరాలకి ఎదురుగానే ఆ వ్యక్తి నమాజ్ చేస్తున్నప్పటికీ తిరుమలలోని భద్రతా సిబ్బంది పట్టించుకోలేదని విమర్శలు వచ్చాయి. ఈ వీడియో నెట్టింట వైరల్ కాగా తిరుమల శ్రీవారి భక్తులు మండిపడ్డారు. తిరుమలలో ఇలా చేయడం ఏమిటని.. భద్రతా సిబ్బంది ఏం చేస్తున్నారంటూ ఆగ్రహం వ్యక్తం చేశారు. ఈ ఘటన మరువకముందే మరోసారి తిరుమలలో మద్యం తాగి పోలీసులు హల్ చల్ చేయడం కలకలం రేపింది.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
