ప్రస్తుత ఆధునిక ప్రపంచంలో టెక్నాలజీని ఒక వరంగా భావిస్తున్న తరుణంలోనే కార్పొరేట్ ఆఫీసుల్లో ఒక నిశ్శబ్ద తిరుగుబాటు మొదలైంది. ముఖ్యంగా జెన్ జెడ్ ఉద్యోగులు తమ భవిష్యత్తును కాపాడుకోవడానికి ఆర్టిఫిషియల్ ఇంటెలిజెన్స్ వాడకాన్ని తెలివిగా అడ్డుకుంటున్నారు. దీనిని నిపుణులు సైలెంట్ సబోటేజ్ అని పిలుస్తున్నారు. చిన్నప్పటి నుండి స్మార్ట్ఫోన్లతో పెరిగిన ఈ తరానికి టెక్నాలజీపై మంచి పట్టు ఉంది.
కానీ ఇప్పుడు అదే టెక్నాలజీ తమ స్థానాన్ని భర్తీ చేస్తుందనే భయం వారిని డెస్ట్రయర్స్ గా మారుస్తోంది. కంపెనీలు ఇచ్చే ఏఐ టూల్స్ను వాడకపోవడం లేదా తప్పుడు డేటాను ఫీడ్ చేయడం ద్వారా అల్గారిథమ్స్ తప్పుగా పని చేసేలా చేస్తున్నారు. ఇది కేవలం భయం మాత్రమే కాదు ఇది ఒక రకమైన మనుగడ పోరాటం.
భవిష్యత్తులో జూనియర్ సాఫ్ట్వేర్ ఇంజనీర్లు, కంటెంట్ రైటర్లు ఇంకా డేటా అనలిస్టుల అవసరం తగ్గిపోవచ్చని ఈ ఖాళీని ఏఐ భర్తీ చేస్తుందని జెన్ జెడ్ గట్టిగా నమ్ముతోంది. అందుకే ఏఐ ప్రాజెక్టులను నీరుగార్చడం ద్వారా తమ అవసరాన్ని కంపెనీలకు గుర్తు చేయాలని వారు ప్రయత్నిస్తున్నారు. దీనివల్ల కంపెనీల వృద్ధి రేటు తగ్గే ప్రమాదం ఉంది.
నమ్మకం కలిగేలా..
ఈ సమస్యకు పరిష్కారంగా కంపెనీలు కేవలం సాఫ్ట్వేర్ అప్గ్రేడ్ చేస్తే సరిపోదు. ఉద్యోగుల మైండ్ సెట్ ను అప్గ్రేడ్ చేయాలి. ఏఐ అనేది ఉద్యోగిని తొలగించడానికి కాదు కేవలం అతని పని భారాన్ని తగ్గించడానికే అని నమ్మకం కలిగించాలి. పాత పనుల స్థానంలో ఏఐని ఎలా మేనేజ్ చేయాలో నేర్పించే ప్రాంప్ట్ ఇంజనీరింగ్ వంటి కోర్సులను తప్పనిసరి చేయాలి. ఏఐ వాడకం వల్ల ఉద్యోగ భద్రతకు ఎటువంటి ఢోకా ఉండదని మేనేజ్మెంట్ భరోసా ఇవ్వాలి. టెక్నాలజీ రివల్యూషన్ ఎప్పుడూ పాత పద్ధతులను తొలగించి కొత్త అవకాశాలను తెస్తుంది. అయితే ఆ మార్పులో మనిషిని భాగస్వామిని చేయనంతవరకు ఇటువంటి తిరుగుబాటు ఉదాహరణలు పెరుగుతూనే ఉంటాయి.
భయపడకూడదు..
2030 నాటికి కార్పొరేట్ సక్సెస్ అనేది ఎంత గొప్ప ఏఐని వాడుతున్నాం అనే దానిపై కాకుండా ఏఐ ఇంకా మనిషి మధ్య ఎంత గొప్ప సమన్వయం ఉందనే దానిపై ఆధారపడి ఉంటుంది. మారుతున్న కాలంతో పాటు మనం మారాలి కానీ మార్పుకు భయపడి వెనకడుగు వేయకూడదు. కంపెనీలు కూడా తమ ఉద్యోగుల భావోద్వేగాలను అర్థం చేసుకుని వారితో కలిసి ప్రయాణించినప్పుడే విజయవంతం అవుతాయి.
ఏఐ ఒక సాధనం మాత్రమే అది మనిషికి ప్రత్యామ్నాయం కాకూడదు. ప్రతిభావంతులైన యువత తమ నైపుణ్యాలను ఏఐతో జోడించి కొత్త అద్భుతాలను సృష్టించాలి. అప్పుడే టెక్నాలజీ అనేది నిజమైన వరంగా మారుతుంది. పారదర్శకమైన వాతావరణం ఉన్నప్పుడే ఏ సంస్థ అయినా అభివృద్ధి చెందుతుంది.
