విశాఖ జిల్లాలో దారుణం జరిగింది. భర్త వేధిస్తున్నడని తన ఇద్దరు పిల్లలతో కలిసి ఓ మహిళ బావిలో దూకింది. ఈ ప్రమాదంలో మహిళ, ఆమె కొడుకు మరణించగా.. పాప బతికింది. ఈ దారుణం పెందుర్తి మండలం సత్తివానిపాలెంలో చోటు చేసుకుంది. కుటుంబ కలహాలే ఆత్మహత్యకు కారణంగా తెలుస్తోంది. సత్తివానిపాలెంలో పవన్, గీత దంపతులు నివాసం ఉంటున్నారు. వీరికి యోక్షితశ్రీ, మణికంఠ అనే ఇద్దరు పిల్లలు ఉన్నారు. అయితే, భర్త పవన్ మద్యానికి బానిసై భార్యను నిత్యం వేధింపులకు గురిచేసేవాడు. ఇలా గత కొంతకాలంగా వీరి మధ్య గొడవ జరుగుతూనే ఉండేది. సోమవారం రాత్రి కూడా భార్య,భర్తల మధ్య తీవ్ర గొడవ జరిగింది. దీంతో తీవ్ర మనస్తాపానికి గురైన గీత.. రాత్రి తన ఇద్దరు పిల్లలను తీసుకొని ఇంటికి దగ్గర్లోని బావి వద్దకు వెళ్లింది. ముందుగా చిన్నారులను బావిలోకి తోసేసి అనంతరం ఆమె కూడా దూకింది. ఈ ఘటనలో గీత, ఆమె కొడుకు మణికంఠ మృతి చెందగా.. కూతురు యోక్షితశ్రీ మాత్రం బావిలోని మెట్టును పట్టుకొని ఉండటంతో ప్రాణాలతో బయటపడింది. అయితే, బావిలో నుంచి అరుపులు వినపడుతుండటంతో స్థానికులు ఆమెను రక్షించారు. కానీ, అప్పటికే గీత, ఆమె కొడుకు మరణించారు. ఇక దీనిపై స్థానికులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతదేహాలను విశాఖ కేజీహెచ్‌కు తరలించారు. దీనిపై పెందుర్తి పోలీసులు కేసు నమోదు చేసి దర్యాప్తు చేస్తున్నారు.గీతకు ఇటీవల తల్లికి వందనం డబ్బులు వచ్చాయి. ఆ డబ్బును పిల్లల చదువుల కోసం.. ఇతర ఖర్చుల కోసం వినియోగించాలని నిర్ణయించుకుంది. అయితే, ఈ విషయం కాస్త భర్త పవన్‌కు తెలిసింది. నాకు ఆ డబ్బులు ఇవ్వాలని భార్య గీతపై తీవ్ర ఒత్తిడి చేసినట్టు స్థానికులు చెబుతున్నారు. దీని గురించే వారి మధ్య సోమవారం రాత్రి గొడవ జరిగిందని అంటున్నారు. ఈ నేపథ్యంలోనే భర్త ఆగడాలను భరించలేక గీత పిల్లలతో కలిసి ఆత్మహత్య చేసుకున్నట్టు స్థానికులు భావిస్తున్నారు.
By .
